बर्ड फ्लुबाट नेपालमै पहिलाे पटक मानिसकाे मृत्यु

0
295

काठमाडौं– बर्ड फ्लुबाट नेपालमै पहिलो पटक मानिसको मृत्यु भएको छ । स्वास्थ्य तथा जनसंख्या मन्त्रालयले बिहीबार पत्रकार सम्मेलन गरेर काभ्रेका २१ वर्षीय एक युवाको इन्फ्लूएन्जा ए (एच५एन१) भाइरसका कारण मृत्यु भएको जानकारी दिएको हो ।

राष्ट्रिय जनस्वास्थ्य प्रयोगशालामा उक्त बिरामीको घाँटीको र्याल परीक्षण गर्दा भाइरसको प्रकार एकीन गर्न सम्भव नभएपछि उक्त नमुना विश्व स्वास्थ्य संगठनको कोलाबेरेटिङ सेन्टर फर इन्फ्यूएन्जा जापानमा परीक्षण गर्दा बर्ड फ्यू पुष्टि भएको हो । मन्त्रालयका अनुसार गत चैत १० मा ज्वरो र खोकी लागेर अस्पताल पुगेका उनलाई इन्फ्लुएन्जाको औषधि दिइएको थियो। उनको श्वासप्रश्वासमा समस्या देखिएर चैत १५ गते मृत्यु भएको थियो । मृतकको नाम भने खुलाइएको छैन।

बर्डफ्लुबाट मृत्यु हुने व्यक्ति ढिला गरी उपचारमा आएको र औषधि दिएर पठाएको इपिडिमियोलोजी तथा रोग नियन्त्रण माहाशाखाका निर्देशक डा विवेकलाल कर्णले जानकारी दिए । उनले परिवारलाई भेटेपछि उनको मृत्यु भएको थाहा पाएको बताए ।

चैत १० गते ती बिरामी ज्वरो र खोकीको लक्षण सहित बिरामी भएर अस्पताल भर्ना भएका थिए भने चिकित्सकले इन्फुएन्जाको संक्रमण भएको शंका लागि घाँटीको र्याल परीक्षणका लागि राष्ट्रिय जनस्वास्थ्य प्रयोगशाला टेकु पठाइएपनि पुष्टि हुन नसकेपछि जापान पठाइएको थियो ।

मन्त्रालयले सो घटनापछि अरु बिरामीमा भने प्रयोगशाला परीक्षणका क्रममा उक्त भाइरसको संक्रमण नदेखिएको स्पष्ट पारेको छ ।

एच५ एन१ भाइरस धेरैजसो पंक्षीहरुमा संक्रमण हुन्छ । संक्रमणले पंक्षीहरुको मृत्यु समेत हुने गर्छ । तर उक्त भाइरस मानिसमा समेत सर्ने गरेको पाइएको छ ।

सन् १९९६ मा भाइरस पत्तालागेदेखि हालसम्म विश्वमा ८ सय ६० जनाको बर्डफ्लुका कारण मृत्यु भइसकेको छ ।

LEAVE A REPLY